Ігар Тышкевіч: Чакаць адкату ў расейскай палітыцы адносна Беларусi не выпадае

17 января 2020
Thinktanks.by
Политика

Выступ Пуіцна, на якім той анансаваў перамены ў сыстэме дзяржаўнага кіраваньня Расейскай Фэдэрацыяй, адстаўка ўраду на чале з Дзьмітрыем Мядзьведзевым, сталі прычынай хвалі камэнтароў у Беларусі.

Гэта натуральна, зважаючы на цяганіну з чарговым інтэграцыйным накатам РФ, газавыя ды нафтавыя спрэчкі. Значная частка асобаў, слова якіх мае вагу, выказвалі аптымізм. Маўляў, новыя контуры трансфэру ўлады ў РФ робяць неактуальнымі размовы пра спробы Крамля прасунуць палітычную частку інтэграцыйных пакетаў - няма ўжо пільнае патрэбы. А адстаўка Мядзьведзева, які мае складаную гісторыю адносінаў з Лукашэнкам і сёньня выглядае прадстаўніком найбольш жорсткага ў пытаньнях Беларусі крыла расейскіх уладных элітаў, мае зьнізіць градус напругі й дае шансы на ўтылізацыю "дарожных картаў" ды кампрамісы (на беларускіх умовах) па вострых тэмах. Такiм каметаром з Thinktanks.by падзялiўся эксперт Українського інституту майбутнього Ігар Тышкевіч.

Па яго словах, на першы погляд, сытуацыя выглядае менавіта так. Але, калі задумацца, то РФ ўжо год як перайшла ад палітыкі "навалу" да, магчыма больш доўгай, але больш эфэктыўнай палітыкі паступовага наступу, якая ўключае стварэньне інстытуцыйнае базы для прасоўваньня ўласных інтарэсаў.

Для такіх задачаў лепш падыходзяць фармальна больш мяккія але разумнейшыя і пасьлядоўныя выканаўцы. Як новы амбасадар РФ, які зьмяніў Бабіча, так і новы прэм'ер РФ, які прыходзіць на замену Мядзьведзеву адносяцца менавіта да такой групы палітыкаў. А сам Мядзьведзеў, дарэчы, атрымлівае кантроль над сілавым блёкам.

Таму, чакаць адкату ў расейскай палітыцы не выпадае. Яна трансфармуецца ў больш асьцярожную, але, адначасова, больш лягічную й пасьлядоўную. Падобныя зьмены фармулююць больш высокія патрабаваньні да плянаў, палітык і дзеяньняў беларускіх элітаў.

Поделиться: